Nuna tamakkerlugu naatsorsuutini siunertarineqarpoq piffissami inuiaqatigiinni aningaasatigut ataqatigiiaat paasiuminaatsut tamakkiisumik takujuminartunngorlugit ersersinnissaat kiisalu tunisassiornerup sullissinerillu qanoq annertutiginerisa ersersinnissaat.
Nioqqutissiorneq sulisut aamma suliffeqarfinnik aningaasarsiummillu piginnittut akissarsiutigaat.
Isertitat taamaalillutik pisortat inuillu atuineranni aningaasartuutinut tunngaviupput. Isertitanit atorneqanngitsut ileqqaarutigineqartarput. Inuiaqatigiit ileqqaarutaat piffissami aningaasaliissutinut soorlu assersuutigalugu maskiinanut illunullu matussutaasarput.
Ileqqaarutit aningaasaliissutissanut matussusiisinnaanngippata, inuiaqatigiit aningaasaliissussanik pisariaqartitsissapput nunanit allanit taarsigassarsinikkut matuneqartariaqartunik, tamannalu akiliisarnerup naligiissinnerani akiligassani ingerlaavartuni amigartoorutaasarluni.
Paarlattuanik ileqqaarutit aningaasaliissutissanit anneruppata taava nunarsuarmioqatinut sanilliullugu inuiaqatigiit inissiiffissaaleqilissapput, tamannalu akiliisarnerup naligiissinnerani akiligassani ingerlaavartuni sinneqartooruteqarnermik ersersitsissalluni.
Taamatut aningaasat kaaviiaartut nuna tamakkerlugu naatsorsuutitigut kisitsisitalerneqartarput; nioqqutissiornermiit aningaasarsiornermut isertitat atuinermut, ileqqaarnermut aamma nunani allani taarsigassarsinermut/inissiinermut atorneqarlutik.
Nuna tamakkerlugu naatsorsuutit suliarineqartarput najoqqutassiat nunat tamalaat akuerisaat malillugit, tassalu nunani tamalaani kisitsisitigut paasissutissanik suliaqarnermik ataqatigiissaarinermillu oqartussaasunit suliarineqarsimasut tassa imaappoq EU-mit, FN-imit, IMF-imit, OECD-imit kiisalu Verdensbankenimit. Taamaaliornikkut paasissutissat piffissap ingerlanerani nunallu akornanni sanilliunneqarsinnaanerat qulakkeerluarneqarput.
Aningaasaqarnerup ineriartornerata misissorneqarneranut aamma Kalaallit Nunaata aningaasaqarnera nunanut allanut sanillersuunneqarneranut nuna tamakkerlugu naatsorsuutini kisitsisit qanoq atorneqarsinnaaneri immikkoortumi matumani takutinneqarpoq. Kisitsisitigut paasissutissanili taaguutit paasiuminaassinnaasarput. Immikkoortumi Taaguutini periaatsinilu assersuutit atorlugit paasiuminarsarneqarput.